ഷോക്കിംഗ് യാത്ര

വൈകുന്നേരം അപ്രതീക്ഷിതമായി പെയ്ത മഴയില്‍ നഗരം മുങ്ങി കുളിച്ചു. ഞാന്‍ വാച്ചിലേക്ക് നോക്കി. സമയം 6 മണി ആവാന്‍ പോവുന്നു. ഇറങ്ങുക തന്നെ ! എന്‍റെ വരവും കാത്തു അവള്‍ പുറത്ത് നില്‍പ്പുണ്ടായിരുന്നു. മഴ മുഴുവന്‍ കൊണ്ടു ആകെ നനഞ്ഞു ഒരു പരുവമായിട്ടുണ്ട്‌. മഴത്തുള്ളികള്‍ ഇറ്റിറ്റു വീണു കൊണ്ടിരുന്ന അവളുടെ ശരീരം ഇളം വെയിലില്‍ വെട്ടിത്തിളങ്ങി. ഞാന്‍ മെല്ലെ അവളുടെ അടുത്തേക്ക് നടന്നു. മഴ നനഞ്ഞതിനാലോ അതോ ഞാന്‍ ഇറങ്ങാന്‍ താമസിച്ചത് കൊണ്ടോ എന്തോ അവള്‍ ഒന്ന് ചലിക്കുക പോലും ചെയ്തില്ല. അടുത്തെത്തി കഴിഞ്ഞു ഞാന്‍ അവളുദ് മുഖത്തേക്ക് നോക്കി. അവളുടെ കണ്ണുകളില്‍ എന്‍റെ രൂപം പ്രതിഫലിച്ചു. അവളുടെ തണുത്ത ശരീരത്തില്‍ ഒട്ടി പിടിച്ച ബാക്കി മഴത്തുള്ളികള്‍ ഞാന്‍ കൈ കൊണ്ടു പതുക്കെ തുടച്ചു മാറ്റി.

എന്നിട്ട്.... എന്നിട്ട്... ഞാന്‍ പതുക്കെ അവളുടെ.... പുറത്ത് കേറി ഒരു ചവിട്ട്‌ വെച്ചു കൊടുത്തു !

ഒറ്റച്ചവിട്ടിന് ബൈക്ക് സ്റ്റാര്‍ട്ട്‌ ആക്കിയ സന്തോഷത്തോടെ ഞാന്‍ വീട്ടിലേക്കു യാത്ര തിരിച്ചു. എന്നത്തേയും പോലെ ജോലി കഴിഞ്ഞു വീട്ടിലേക്കുള്ള ഒരു സാധാരണ മടക്കയാത്ര എങ്ങനെയാണ് ഷോക്കിംഗ് ആയത്‌ എന്നല്ലേ അറിയേണ്ടത് ? പറയാം !

തണുത്ത കാറ്റൊക്കെ കൊണ്ടു ബൈക്കില്‍ പോവാന്‍ തന്നെ ഒരു പ്രത്യേക സുഖമാണ്. ചെറിയ ചാറ്റല്‍ മഴയും കൂടി ആയാല്‍ പിന്നെ പറയുകയേ വേണ്ടാ.. കുളിര് കൊണ്ടു ശരീരമാസകലം രോമാഞ്ചം വരും. അങ്ങനെ കുളിരൊക്കെ കൊണ്ടു യാത്ര ചെയ്യുമ്പോഴാണ് ഒരു കാര്യം ശ്രദ്ധിച്ചത്... രോമാഞ്ചം അല്പം കൂടുതല്‍ അല്ലേ എന്നൊരു സംശയം.... എസ്പെഷലി കൈപ്പത്തികളില്‍. ആദ്യമൊന്നും ഞാന്‍ കാര്യമാക്കിയില്ല. പിന്നെ പിന്നെ കുളിര് മാറി സൂചി കുത്തുന്നത് പോലെ ഒരു ഫീലിംഗ് ഒക്കെ ആയപ്പോ ഞാന്‍ ഇന്‍വെസ്ടിഗേഷന്‍ തുടങ്ങി. ബ്രേക്ക്‌ ആന്‍ഡ്‌ ക്ലച്... രണ്ടും പിടിക്കുമ്പോഴാണ് ഈ പ്രശ്നം. യൂറീക്ക !

ബ്രേക്ക്‌ ആന്‍ഡ്‌ ക്ലച് രണ്ടിലും കറന്റ്‌ അഥവാ ഷോക്ക്‌ അടിക്കുന്നു. ശിവ ശിവ! ആദ്യമായിട്ടാണ് ഇങ്ങനെ ഒരു അനുഭവം. വലിയ ഷോക്ക്‌ അല്ലെങ്കില്‍ തന്നെയും ഞെരി പിരി കൊല്ലാന്‍ ഇതൊക്കെ മതി. ഉടന്‍ തന്നെ വണ്ടി സൈഡ് ആക്കി കര്‍ചീഫ്‌ എടുത്ത് ഹാന്‍ഡില്‍ മൊത്തത്തില്‍ തുടച്ചു നനവ്‌ ഒക്കെ കളഞ്ഞു. ടെസ്റ്റ്‌ ഡ്രൈവ് നടത്തിയപ്പോ ഷോക്ക്‌ പിന്നേം തെങ്ങില്‍ തന്നെ. വണ്ടി ഉപേക്ഷിച്ചു പോവാന്‍ പറ്റില്ല... തള്ളാന്‍ ഉള്ള ആരോഗ്യമില്ല... നന്നാക്കാന്‍ ഉള്ള ബുദ്ധിയുമില്ല... രണ്ടും കല്‍പ്പിച്ചു ഓടിക്കുക തന്നെ... ഡ്രൈവിംഗ് സ്റ്റൈല്‍ കുറച്ചു മാറ്റം വരുത്തിയെന്ന് മാത്രം.

സദ്യക്ക് ഇലയില്‍ നിന്നും അച്ചാറ് ഒരു വിരല്‍ വെച്ചു തോണ്ടിയെടുക്കുന്നത്‌ പോലെ ഒരു വിരല്‍ കൊണ്ടു ബ്രേക്ക്‌ അല്ലെങ്കില്‍ ക്ലച് പിടിക്കുന്നത്‌ നിര്‍ത്തി. ഒറ്റ വിരലില്‍ കൂടി കറന്റ്‌ പോവുമ്പോ എന്താ ഒരു സുഖം ! അത് കൊണ്ടു അല്പം ആക്രാന്തം കാണിക്കുക തന്നെ... നാല് പറ്റുമെങ്കില്‍ അഞ്ച് വിരലും യുസ് ചെയ്യാന്‍ തുടങ്ങി.

ട്രാഫിക്‌ ബ്ലോക്കില്‍ പെടുമ്പോള്‍ ആണ് പാട്... ക്ലച്ചും ബ്രേയ്കും ഒരുമിച്ച് പിടിച്ചു ഞാന്‍ വെളിച്ചപ്പാടിനെ കൂട്ട് വിറച്ചു കൊണ്ടിരിക്കും. നാട്ടുകാര്‍ നോക്കുമ്പോ ബൈക്ക് നെക്കാളും കുലുക്കം ബൈക്ക് ഓടിക്കുന്ന ആള്‍ക്ക്! എന്‍റെ പ്രാണവേദന അവര്‍ക്ക് മനസ്സിലാവില്ലല്ലോ. അവസാനം ആടിയുലഞ്ഞു എങ്ങനോക്കെയോ വീടെത്തി ചേര്‍ന്നു.

പിറ്റേന്ന് വണ്ടിക്കു യാതൊരു കുഴപ്പവുമില്ല. നനഞ്ഞാല്‍ മാത്രമേ ആള് പിശകാവൂ. ബാറ്ററിയില്‍ നിന്നും എവിടെയോ ഷോര്‍ട്ട് ആവുന്നു എന്നാണു FIR റിപ്പോര്‍ട്ട്‌. അത് ശരിയാക്കുന്നത് വരെ ഞാന്‍ നനഞ്ഞാലും സാരമില്ല പക്ഷെ ബൈക്ക് നനയാന്‍ ഞാന്‍ സമ്മതിക്കൂലാ !