മൊബൈല്‍ തേപ്പ്

സമയം ഉച്ചക്ക് 2 മണി കഴിഞ്ഞു 25 മിനിറ്റ്. കമ്പനിയില്‍ എല്ലാവരും ലഞ്ച് അടിച്ചതിന്റെ ക്ഷീണത്തില്‍ അവരവരുടെ ക്യുബിക്കിളില്‍ ഉറങ്ങാനുള്ള മാര്‍ഗങ്ങള്‍ അന്വേഷിച്ചു ഇരിക്കുന്നു. ഇര വിഴുങ്ങിയ ആനക്കൊണ്ടയെ പോലെ ദാസപ്പനും കസേരയില്‍ ചുരുണ്ട് കൂടി ഇരിപ്പുണ്ട്. മുന്നിലുള്ള കമ്പ്യൂട്ടര്‍ സ്ക്രീനില്‍ SQL server. ഡാറ്റാബേസ് കൊറികള്‍ (query) തിരിച്ചും മറിച്ചും എക്സിക്യൂട്ട് ചെയ്ത് പരവശനാവുന്നതല്ലാതെ ഉത്തരം മാത്രം കിട്ടുന്നില്ല. ഈ കൊറികള്‍ കൂടാതെ വൈകിട്ട് ചായക്കൊപ്പം കൊറിക്കാന്‍ പരിപ്പുവടയാണോ അതോ പഴംപൊരിയാണോ എന്നതും ഉത്തരം കിട്ടാത്ത വേറൊരു ചോദ്യം !

ട്രിംഗ് ട്രിംഗ് .... ട്രിംഗ് ട്രിംഗ് !

നിശബ്ദതയ്ക്കു ഫുള്‍ സ്റ്റോപ്പ്‌ ഇട്ടു കൊണ്ടു ദാസപ്പന്റെ മൊബൈല്‍ തുള്ളിക്കളിച്ചു. എടുത്ത് നോക്കിയപ്പോള്‍ 'unknown number'. ഇതാരപ്പാ എന്ന് മനസ്സിലോര്‍ത്തു കൊണ്ടു അവന്‍ ഫോണ്‍ അറ്റന്‍ഡ് ചെയ്തു.

'ഹലോ'
'ഹലോ.....'

അപ്പുറത്ത് നിന്നും ഒരു കിളിനാദം. പെണ്ണ് തന്നെ ! അത്രയും നേരം വാതം വന്നവനെ പോലെ തളര്‍ന്നു കിടന്ന ദാസപ്പന്‍ അടുത്ത നിമിഷം കോമ്പ്ലാന്‍ ബോയ്‌ ആയി.

'ഹലോ... ആരാ ??'
'എന്നെ മനസ്സിലായില്ലേ ? നമ്മള്‍ ഇതിനു മുന്‍പ് സംസാരിച്ചിട്ടുണ്ട് !'

ങേ ??? ദാസപ്പന്‍ കണ്ഫ്യുഷ്യസ് ആയി. ആരാണാവോ ? ബാംഗ്ലൂര്‍ ടീന ? ചെന്നൈ അനന്തലക്ഷ്മി അതോ ഇനി കൊച്ചിയിലെ ആതിര എന്നൊക്കെ പറയാന്‍ ദാസപ്പന്‍ ആഗ്രഹിച്ചു. പക്ഷെ ചുമ്മാ പറഞ്ഞിട്ടെന്തു കാര്യം? ദാസപ്പന്‍ മനസ്സില്‍ ഒരു കൊറി അയച്ചു.

SELECT * FROM പഴയ_കേസുകെട്ട്‌ WHERE സ്റ്റാറ്റസ് = SINGLE order by സൌന്ദര്യം

'ആരാണെന്നു മനസ്സിലാവുന്നില്ല... എങ്ങനെയാ പരിചയം ?'
'ഞാന്‍ പറയുന്നത് ഒന്ന് കേള്‍ക്കൂ... ഇനി ഇത് ഇങ്ങനെ നീട്ടിക്കൊണ്ടു പോവാന്‍ പറ്റില്ല...'

ദാസപ്പന്റെ തലയില്‍ ഒരു കൊള്ളിയാന്‍ മിന്നി! എന്ത് നീട്ടിക്കൊണ്ടു പോവാന്‍ ? അവന്‍ ഉടന്‍ തന്നെ കൊറിയില്‍ ചില മാറ്റങ്ങള്‍ വരുത്തി.

SELECT * FROM പഴയ_കേസുകെട്ട്‌ WHERE ഭാവി IN (പാര, തേപ്പ്, പെരുവഴി, കെണി, പോക്കുമുതല്‍) ORDER BY DISTANCE_FROM_TVM

'കുട്ടി എന്തൊക്കെയ പറയുന്നേ ? എനിക്കൊന്നും മനസ്സിലാവുന്നില്ല !'
'ഇപ്പൊ തന്നെ എല്ലാവരും അറിഞ്ഞു തുടങ്ങി. എന്തൊരു നാണക്കേടാ... ഒന്ന് ആലോചിച്ചു നോക്കൂന്നെ ! ഇനിയെങ്കിലും ഞാന്‍ പറയുന്നത് ഒന്ന് കേട്ടുകൂടെ ?'

AC മുറിയില്‍ ഇരുന്നിട്ട് കൂടി ദാസപ്പന്‍ വിയര്‍ത്തു കുളിച്ചു. എല്ലാരും എന്ന് പറഞ്ഞാല്‍ ആരോക്കെയാടീ കൊച്ചേ ?? നാട്ടുകാര്‍,വീട്ടുകാര്‍,കൂട്ടുകാര്‍ തുടങ്ങിയ കാറുകള്‍ ആയിരിക്കും! തല്ല് മേടിച്ചു കൂട്ടുന്ന വഴി അറിയൂല. ഈ അപവാദം എങ്ങാനും ഓഫീസിലെ റിസപ്ഷനിസ്റ്റ് സുന്ദരി അറിഞ്ഞാല്‍ പിന്നെ ഇവിടെ നിന്നു രാജിവെക്കാനേ നിവര്‍ത്തിയുള്ളൂ.. മൗസ് വെച്ചു സ്ക്രീന്‍ രണ്ട് തവണ റിഫ്രഷ് ചെയ്തിട്ട് എല്ലാം ശരിയാവാന്‍ ദൈവത്തോട് പ്രാര്‍ഥിച്ചു. ദാസപ്പന്‍ അവസാനമായി മനസ്സില്‍ വിചാരിച്ച കൊറികള്‍ ഇപ്രകാരം...

DELETE പഴയ_കേസുകെട്ട്‌
UPDATE ജീവിതം SET സ്റ്റാറ്റസ് = ബ്രഹ്മചാരി
COMMIT

രണ്ടും കല്‍പ്പിച്ചു ദാസപ്പന്‍ ദേഷ്യത്തില്‍ ചോദിച്ചു...

'നീ എതാടി പെണ്ണേ ? കുറച്ചു നേരമായല്ലോ മനുഷ്യനെ വടി ആക്കണ വര്‍ത്തമാനം തുടങ്ങിയിട്ട്... ആരാണെന്ന് മര്യാദയ്ക്ക് പറഞ്ഞോ...അതാ നല്ലത്...'

അപ്പുറത്ത് നിശബ്ധത... അടുത്ത നിമിഷം മറുപടി വന്നു...

'നിനക്ക് ഈ ബോറടിപ്പിക്കുന്ന ട്രിംഗ് ട്രിംഗ് മാറ്റി നല്ല അടിപൊളി പാട്ട് ഇട്ടു കൂടെ..??? **ഡിഷ്‌** (സൌണ്ട് എഫ്ഫക്റ്റ്‌)
-- കേട്ടില്ലേ കേട്ടില്ലേ എന്‍റെ കള്ള ചെറുക്കന് കല്യാണം --- ഈ പാട്ട് നിങ്ങളുടെ കോളര്‍ ട്യൂണ്‍ ആയി സെറ്റ് ചെയ്യാന്‍ 1 അമര്‍ത്തുക !'

**ഡിഷ്‌** (വീണ്ടും സൌണ്ട് എഫ്ഫക്റ്റ്‌ )... ഫോണ്‍ തറയിലേക്കു വലിച്ച് എറിയുമ്പോ ഉണ്ടാവുന്ന ശബ്ദം ഒന്ന് കേള്‍ക്കേണ്ടത് തന്നെയാണേ !