ചിന്ന സഹായം

"ഹലോ അളിയാ... ഇതു ഞാനാ..."
"ആ നീയോ... എന്നാ ഉണ്ടെടാ വിശേഷങ്ങള്‍ ?"

"ഓ എന്ത് പറയാന്‍... ഇങ്ങനെ ഒക്കെ പോവുന്നു... നിനക്കു സുഖാണോ ?"
"എന്നാ പറയാന്നാന്നെ ? ഇവിടെയും അതെ അവസ്ഥ തന്നെ.. "

"അളിയാ.. ഞാന്‍ വിളിച്ചത്... എനിക്ക് ഒരു ചിന്ന സഹായം വേണം..."
"സഹായമോ ? എന്നതാടാ ? നിന്റെ പണി വല്ലോം തെറിക്കുമോ ? നീ പേടിക്കെന്ടെടാ ഊവേ ഞാനും കൂടെ ഉണ്ട്... നമുക്കു നാട്ടില്‍ പോയി വല്ല ചായക്കടയും തുടങ്ങി ജീവിക്കാമെന്നെ... എനിക്ക് ഇവിടം മടുത്തു !"

"തമാശിക്കല്ലേ അളിയാ... അതല്ല ഞാന്‍ പറഞ്ഞു വന്നത്... "
"പിന്നെ ? നിനക്കു കാശ് വല്ലോം വേണോ? ഞാനേ ഇവിടെ പിച്ചക്കാരനായി ഇരിക്കുവാന്നെ.... അതിരിക്കട്ടെ നിനക്കു എത്രയാ വേണ്ടേ ?"

"അതൊന്നുമല്ലെടാ.... പറയുന്നതു കേള്‍ക്ക്... "
"ആഹാ ... ഇപ്പൊ പിടികിട്ടി... നീയും ലവളും കൂടി ഒളിച്ചോടാന്‍ തീരുമാനിച്ചു അല്ലെ? എടാ ഭയങ്കരാ.. നിന്നെ കുറിച്ചു ഞാന്‍ ഇത്രയും വിചാരിച്ചില്ല... എന്റെ പോന്നോ! പണ്ടു മൂക്കും ഒലിപ്പിച്ചോണ്ട് നടന്ന ചെറുക്കനാ... ഇപ്പൊ ഒരു പെണ്ണിന്റെ പിറകെ ഒലിപ്പിച്ച് നടന്നു അവസാനം കെട്ടാന്‍ പോണു.... കാലം പോയ ഒരു പോക്കേ.... എന്തായാലും അളിയാ എന്റെ വക എല്ലാ ആശംസകളും നേരുന്നു... അല്ലാതെ ഈ കാര്യത്തില്‍ എനിക്ക് നിന്നെ ഒരു വിധത്തിലും സഹായിക്കാന്‍ പറ്റില്ല.... പെണ്ണ് കേസാ... ഒന്നാമത്തെ ഇപ്പൊ സോഫ്റ്റ്‌വെയര്‍ എഞ്ചിനീയര്‍ എന്ന് പറഞ്ഞാലേ പെണ്ണ് കിട്ടില്ല.... അതിന്റെ കൂടെ ഇതും കൂടി ആയാല്‍ ഞാന്‍ പിന്നെ പള്ളീലച്ചന്‍ ആവേണ്ടി വരും !"

"അല്ലെങ്കിലും നീ ഈ കാര്യത്തില്‍ സഹായിക്കില്ല എന്ന് എനിക്ക് ഉറപ്പായിരുന്നു.... പക്ഷെ ഇതു സംഗതി വേറെ... ഞാന്‍ പറയുന്നതു നീ ഒന്നു കേള്‍ക്കുമോ?"
"അപ്പൊ ഇതൊന്നുമല്ലേ കാര്യം? ശരി അളിയാ... നീ പറ.... ഞാന്‍ എന്നതാ നിനക്കു ചെയ്തു തരേണ്ടത്‌?"

"അത് പിന്നെ.... വേറൊന്നുമല്ല... ഞാന്‍ ഒരു ബ്ലോഗ് തുടങ്ങി.... അളിയന്‍ അത് വായിച്ചു കമന്റ്‌ ഇടണം... പിന്നെ ഓഫീസില്‍ കൂടെ വര്‍ക്ക്‌ ചെയ്യുന്ന എല്ലാരെ കൊണ്ടും കമന്റ്‌ ഇടീക്കണം... ബ്ലോഗ് അഡ്രസ്‌ ഞാന്‍ sms അയക്കാം... ഇപ്പൊ പറഞ്ഞാല്‍ അളിയന്‍ മറന്നാലോ? ഇനിയും കുറെ പേരെ വിളിക്കാനുണ്ടേ... അല്പം തിരക്കുണ്ട്‌...... അപ്പൊ എല്ലാം പറഞ്ഞ പോലെ !"
"............."