എംബണ്ടേ ചരിതം

സ്ഥലം : തിരുവനന്തപുരത്തെ വലിയതുറ കടല്പാലം

കഥാപാത്രങ്ങള്‍ : ഞാന്‍, ദാസപ്പന്‍, ജഗ്ഗു, സുബിന്‍

ജോലി ഒക്കെ ആയതില്‍ പിന്നെ എല്ലാവരും ഒത്തു കൂടുന്ന അവസരങ്ങള്‍ നന്നേ കുറഞ്ഞിരിക്കുന്നു. അങ്ങനെ ഒരു അവസരത്തില്‍ ആണ് ഈ സംഭവം നടന്നത്. മാസങ്ങള്‍ക്കു ശേഷം കിട്ടിയ കുറച്ചു അവധി ദിവസങ്ങളില്‍ ഞങ്ങള്‍ നാടു ചുറ്റാന്‍ ഇറങ്ങും. കടല്പാലം ഞങ്ങളുടെ ഒരു സ്ഥിരം ലൊക്കേഷന്‍ ആയിരുന്നു. ബൈക്കുകള്‍ ഒതുക്കി വെച്ചിട്ട് ഞങ്ങള്‍ കടല്പാലം ലക്ഷ്യമാക്കി നടന്നു തുടങ്ങി. കുറച്ചു നേരം കത്തി വെക്കുക്ക, കടലില്‍ സുര്യാസ്തമനം കാണുക പിന്നെ ഇന്ത്യന്‍ കോഫി ഹൌസില്‍ പോയി കുട്ലെട് കഴിക്കുക..അല്ലെങ്ങില്‍ കുറച്ചു കൂടി ഗ്രാന്‍ഡ്‌ ആയിട്ട് ഏതെങ്കിലും ഹോട്ടലില്‍ പോയി പൊറോട്ടയും ചിക്കന്‍ ഫ്രൈയും തട്ടുക... ഇതായിരുന്നു പ്ലാന്‍.

സുബിന്‍ അവന്റെ കോഴ്സ് വിശേഷങ്ങള്‍, ഞാനും ദാസപ്പനും ജോലിയുടെ വിശേഷങ്ങള്‍, ജഗ്ഗു തന്റെ പഠിപ്പിക്കല്‍ വിശേഷങ്ങള്‍ എല്ലാം പറഞ്ഞു തുടങ്ങി. ഓരോന്ന് പറഞ്ഞു പറഞ്ഞു ചര്ച്ച സിനിമകളെ കുറിച്ചായി. പുതിയ സിനിമകള്‍ ഇന്‍റര്‍നെറ്റില്‍ വന്നാല്‍ അത് ഡൌണ്ലോഡ് ചെയ്തു കാണുക എന്നത് ഞങ്ങളുടെ സ്ഥിരം എര്പാട് ആയിരുന്നു. സുബിന്‍ ഒഴികെ ബാക്കി എല്ലാവര്ക്കും നല്ല കിടിലം ഇന്റര്‍നെറ്റ് കണക്ഷന്‍ ഉണ്ട്. ഞങ്ങള്‍ പരസ്പരം ഡൌണ്ലോഡ് വിശേഷങ്ങള്‍ ഘോരഘോരം പറയാന്‍ തുടങ്ങി.

ഞാന്‍: "ഡാ.. ഞാന്‍ രണ്ടു ദിവസം കൊണ്ടു അഞ്ചു സിനിമകള്‍ തീര്ത്തു"

ദാസപ്പന്‍: "ഞാന്‍ ഒരു ദിവസം കൊണ്ടു രണ്ടര സിനിമ തീര്ത്തു"

സിനിമകളില്‍ പൊതുവെ ഇന്റെരെസ്റ്റ്‌ ഇല്ലാതിരുന്ന ജഗ്ഗു പോലും വിട്ടു കൊടുത്തില്ല "ഞാന്‍ പാട്ടുകള്‍ ഡൌണ്ലോഡ് ചെയ്തു തകര്‍ക്കുവാ... "

ഇതൊക്കെ കേട്ട്‌ നിന്ന സുബിന്‍ ഡോഗ് ഷോവില്‍ വഴി തെറ്റി കേറി വന്ന ചൊക്ലി പട്ടിയുടെ അവസ്ഥയിലായി. ഇനി മിണ്ടിയില്ലെങ്ങില്‍ മാനം പോവും എന്ന് ഉറപ്പിച്ചപ്പോള്‍ സുബിന്‍ തന്റെ തൊണ്ട ഒക്കെ ഒന്നു ശെരിയാക്കി ഒരു വാചകം അങ്ങ് കാച്ചി.

"എനിക്കും നിങ്ങളെ പോലെ സ്പീഡ് ഉള്ള കണക്ഷന്‍ ഉണ്ടായിരുന്നെങ്ങില്‍ 'എംബണ്ടേ' ഡൌണ്ലോഡ് ചെയ്തേനെ !!!"

ഡിംഗ്

ഞങ്ങള്‍ മൂന്ന് പേരുടേയും ട്യൂബ് ലൈറ്റുകള്‍ മിന്നി കളിച്ചു. ഇതു വരെ കേള്‍കാത്ത എന്തോ ഒരു സാധനം സുബിന്‍ ഡൌണ്ലോഡ് ചെയ്യുമെന്ന്. എന്താണത്? സിനിമയോ, പാട്ടോ അതോ ഗെയിം ?ഇനി ഇന്നലെ ഇറങ്ങിയ വല്ല സോഫ്റ്റ്‌വെയര്‍ ആണോ ? സിനിമ ആണെങ്ങില്‍ അത് ഏത് ഭാഷ? പഴയതോ പുതിയതോ ? പാട്ടു ആണെങ്ങില്‍ അതിന്റെ മ്യൂസിക് ആര് ? ആര് പാടി ? ഗെയിം ആണെങ്ങില്‍ അത് കളിയ്ക്കാന്‍ ത്രീ ഡി കാര്‍ഡ് വേണോ ? സോഫ്റ്റ്‌വെയര്‍ ആണെങ്ങില്‍ എന്തിന് വേണ്ടി ഉള്ളത്? ഒരു സെക്കന്റ് കൊണ്ടു ഇത്ര അധികം സംശയങ്ങള്‍ ഞങ്ങളുടെ മനസ്സിലൂടെ കണ്ടന്നു പോയി... ആറടി പൊക്കമുള്ള സുബിന്‍ വീണ്ടും പൊങ്ങിയോ എന്ന് സംശയം..

ഞങ്ങള്‍ ഭയഭക്തി ബഹുമാനത്തോടെ സുബിന്‍ ഇനി എന്തൊക്കെ പറയും എന്ന് നോക്കി നിന്നു...എന്നാല്‍ സുബിന്‍ ആണെങ്ങിലോ 'ഇവന്മാര്‍ക്കെന്തു പറ്റി?' എന്ന ഭാവത്തില്‍ ഞങ്ങളെ നോക്കി കണ്ണ് തള്ളുന്നു. അവസാനം തോല്‍വി സമ്മതിച്ചു ഞങ്ങള്‍ സുബിനോട് തന്നെ ചോദിച്ചു..

"അളിയാ.. നീ ഇപ്പൊ പറഞ്ഞ "എംബണ്ടേ" എന്ന പടം എപ്പോ റിലീസ് ആയി ?? ഞങ്ങള്‍ അതിനെ കുറിച്ചു കേട്ടിട്ടില്ല..."
"എംബണ്ടേ പടം ആവില്ലെടാ... അത് വല്ല മ്യൂസിക് ട്രൂപ്പ് ആയിരിക്കും"
"എടാ.. എംബണ്ടേ ഗെയിം എന്താണ്? വെടി വെപ്പ് ആണോ ?"

അപ്പോള്‍ സുബിന്‍ വളരെ സീരിയസ് ആയിട്ട്, " അളിയാ... അത് സിനിമയും പാട്ടും ഒന്നുമല്ലെടാ ... എന്റെ ഒരു പ്രയോഗം ആണ്"


റിപ്ലേ !!!


"എംബണ്ടേ" ഡൌണ്ലോഡ് ചെയ്തേനെ... എന്നേ ഡൌണ്ലോഡ് ചെയ്തേനെ... ഞാന്‍ പണ്ടേ ഡൌണ്ലോഡ് ചെയ്തേനെ..

ഞാന്‍ + എന്നേ + പണ്ടേ = എംബണ്ടേ

ഓഹോ.. അപ്പൊ ഇതാണ് എംബണ്ടേ... മൂന്ന് പേരുടേയും ബ്രയിനില്‍ കാര്യങ്ങള്‍ ഉജാല മുക്കിയ തുണി പോലെ ക്ലിയര്‍ ആയി...ഞങ്ങള്‍ ഇപ്രാവശ്യം സുബിനെക്കാളും സീരിയസ് ആയിട്ട് ചോദിച്ചു," മോനേ... സുബിനെ... കുട്ടാ.. നീ എന്ത് ഡൌണ്ലോഡ് ചെയ്യുമെന്ന പറഞ്ഞെ ?? നീ ഒന്നു കൂടി പറഞ്ഞെ..."

സുബിന്‍ പറയുന്നു, "എംബണ്ടേ ഡൌണ്ലോഡ് ചെയ്തേനെ എന്ന്.. എന്താടാ മനസ്സിലായില്ലെ ?"

ഞങ്ങള്‍: "മനസ്സിലായില്ല... എന്ത് കുന്തമാടാ എംബണ്ടേ?"

സുബിന്‍: "നീയൊക്കെ കേരളത്തില്‍ തന്നെ ഉള്ളവര്‍ ആണോടെ ? നിനക്കൊന്നും എംബണ്ടേ എന്താണെന്നു അറിയില്ലേ ?"

ഞങ്ങള്‍ ആകെ ധര്‍മസങ്കടത്തില്‍ ആയി. ഇനി ഇവന്‍ പറയുന്നതു പോലെ വല്ല പ്രയോഗവും ഉണ്ടാവുമോ ? അവസാനം മണ്ടന്മാരായ ഞങ്ങള്‍ 'വെറും മണ്ടന്മാര്‍' ആവുമോ..? അത് അറിയാന്‍ ഇനി ഒരു വഴിയേ ഉള്ളു..

"സുബിനെ... നീ ഇവിടെ നിക്ക്.. ഞങ്ങള്‍ കപ്പലണ്ടി മേടിച്ചിട്ട് വരാം" എന്ന് പറഞ്ഞു ഞങ്ങള്‍ മുങ്ങുന്നു...കടല്‍ കാണാന്‍ കുറച്ചു കോളേജ് കുമാരികള്‍ ഉണ്ടായിരുന്നത് കൊണ്ടു സുബിന്‍ എതിര്‍പ്പൊന്നും പ്രകടിപ്പിച്ചില്ല.. നാശങ്ങള്‍ പോകട്ടെ എന്ന് മനസ്സില്‍ വിചാരിചോണ്ട് അവന്‍ പറഞ്ഞു, "ശരി.. ശരി.. തിരികെ വരുമ്പോ എനിക്കും മേടിച്ചോണ്ട് വാ.."

കുറച്ചു മാറി നിന്നിട്ട് നമ്മള്‍ പരിപാടി ആരംഭിച്ചു... ആദ്യം സാധനം കൈയില്‍ എടുക്കുന്നു.. സാധനം എന്ന് വെച്ചാല്‍ മൊബൈല് ഫോണ്‍. എന്നിട്ട് തിരുവനന്തപുരം മുതല്‍ കൊല്ലം, കൊച്ചി, തൃശൂര്‍, പാലക്കാട്, മലപ്പുറം, ഇടുക്കി തുടങ്ങിയ സ്ഥലങ്ങളില്‍ ഉള്ള എല്ലാ അലവലാതി കൂട്ടുകാരെയും വിളിച്ചു അന്വേഷിച്ചു... "എന്താണ് എംബണ്ടേ??"

ചിലര്‍ അമ്പരക്കുന്നു... ചിലര്‍ പൊട്ടിച്ചിരിക്കുന്നു... വേറെ ചിലരോ നല്ല മുട്ടന്‍ തെറി വിളിക്കുന്നു...ഇതോടെ ഞങ്ങള്‍ ഒരു കാര്യം ഉറപ്പിച്ചു... സുബിന്‍ പറയാന്‍ ഉദ്ദേശിച്ച കാര്യങ്ങള്‍ പെട്ടെന്ന്‍ പറഞ്ഞപ്പോള്‍ നാവു സ്ലിപ് ആയിട്ട് ഇതു വരെ കേള്‍കാത്ത എന്തോ സംഭവം പുറത്തു വന്നതാണെന്നും എന്നാല്‍ അത് സമ്മതിച്ചു തരാനുള്ള സാമാന്യ മര്യാദ അവന്‍ കാണിക്കാതെ വീണിടത്ത് കിടന്നു ഉരുണ്ടു മറിഞ്ഞു തല കുത്തി നിന്നു കഥകളി കളിക്കുവാണ് . ഇവനെ അങ്ങനെ വിട്ടാല്‍ ശരിയാവില്ലാ...

വെറും കൈയോടെ വന്ന ഞങ്ങളെ കണ്ടു സുബിന്‍ ചോദിച്ചു," എവിടെയാടാ നീയൊക്കെ കൊണ്ടു വരാമെന്ന് പറഞ്ഞ കപ്പലണ്ടി?"

കപ്പലണ്ടി കിട്ടാത്ത സുബിനെ കണ്ടപ്പോള്‍ എന്തോ കിട്ടാത്ത അണ്ണാന്‍ , എല്ല് കിട്ടാത്ത പട്ടി മുതലായ ഉപമകള്‍ മനസ്സില്‍ തോന്നി. ബട്ട് ഞങ്ങള്‍ അത് പ്രകടിപ്പിച്ചില്ല.. സുബിനെ വടി ആക്കാന്‍ വേണ്ടി (അല്ലെങ്ങിലും വടി പോലെ ആണ് ഇരിക്കുന്നെ.. വടിയെ എങ്ങനെയാ വീണ്ടും വടി ആക്കണേ... ആ.. എന്തെങ്ങിലും ആവട്ടെ!) ഞങ്ങള്‍ പ്ലാന്‍ ചെയ്തത് പോലെ പെര്‍ഫോര്‍മന്‍സ് റൌണ്ട് തുടങ്ങുന്നു.

ഞാന്‍: " ഡാ സുബിനെ... നിനക്കു കപ്പലണ്ടി എംബണ്ടേ ഇഷ്ടമായിരുന്നോ.. ?"

ജഗ്ഗു : "നീ എംബണ്ടേ മണ്ടന്‍ ആയിരുന്നോ അതോ വളര്‍ന്നപ്പോള്‍ മണ്ടന്‍ ആയതാണോ ?"

ദാസപ്പന്‍ : "ഇവന്‍ എംബണ്ടേ ഇങ്ങനെ തന്നെ ആയിരുന്നു... ഓര്‍മയില്ലെടാ അഭീ.. എംബണ്ടേ നമ്മള്‍ ഒരേ സ്കൂളില്‍ എംബണ്ടേ ഒരു ക്ലാസ്സില്‍ എംബണ്ടേ ഒരേ ബെന്ചില്‍ ഒരുമിച്ചു പഠിച്ചപ്പോഴും ഇവന്‍ ഇങ്ങനെ തന്നെ ആയിരുന്നു.. അപ്പോള്‍ ഉറപ്പിച്ചോ.. ' എംബണ്ടേ സുബിന്‍ ' ഇങ്ങനെ തന്നെ ആയിരുന്നു... !!"

ഇതൊക്കെ കേട്ട്‌ കഴിഞ്ഞപ്പോള്‍ സുബിന്റെ തലയില്‍ ഒരു കപ്പലണ്ടി.. സോറി ബള്‍ബ് കത്തുന്നു.. !! പിന്നെ എംബണ്ടേ പോയിട്ട് "എം" എന്ന് പോലും സുബിന്‍ ആ ദിവസം മിണ്ടിയിട്ടില്ല. ആ നിമിഷം മുതല്‍ അനിശ്ചിതകാലത്തേക്ക് അവന്‍ മൌനവൃതം ആചരിച്ചു..

അങ്ങനെ സുബിന്റെ ഇരട്ടപേരുകളുടെ കൂട്ടത്തില്‍ ഒരെണ്ണം കൂടി... മലയാള നിഘണ്ടുവില്‍ ചേര്‍ക്കുവാന്‍ പുതിയ ഒരു വാക്കും... !!

"എംബണ്ടേ" ചരിതം ഇവിടെ പൂര്‍ണമാവുന്നു.... !!