ഹലോ

ഹലോ
ഹലോ
ഇതു ****** കമ്പനിയില്‍ ജോലി ചെയ്യുന്ന ജയന്‍ അല്ലെ ?
അതെ ... ഇതാരാണ് ?
എന്നെ മറന്നോ ?
നല്ല പരിചയമുള്ള ശബ്ദം ആണല്ലോ..
ഒന്നു ഓര്‍ത്തു നോക്കിയെ
*കുറച്ചു നേരത്തെ നിശബ്ദത*
ഇന്ദു ?
അപ്പോള്‍ ഓര്‍മയുണ്ട്... ഞാന്‍ വിചാരിച്ചു ജയേട്ടന്‍ എന്നെ മറന്നു കാണുമെന്നു..
നീ... എങ്ങനെ.. എവിടെ ? എന്റെ നമ്പര്‍ എവിടുന്നു കിട്ടി ?
അതൊക്കെ കിട്ടി... ജയേട്ടന് സുഖാണോ?
സുഖം തന്നെ.. നിനക്കോ ?
എനിക്കും സുഖം... എന്നാലും കല്യാണത്തിന് എന്നെ വിളിച്ചില്ലല്ലോ..
അത് പിന്നെ.. നീ വീട്ടുകാരോടൊപ്പം നാടു വിട്ടപ്പോ..
നാടു വിട്ടപ്പോ എന്നെ മറന്നല്ലേ ? എന്നാലും എനിക്ക് ജയെട്ടനെ മറക്കാന്‍ കഴിഞ്ഞില്ല...
ഇന്ദൂ.. നീ എന്തൊക്കെയാ ഈ പറയുന്നേ ?
സത്യം.. എന്നെങ്ങിലും ജയേട്ടന്‍ എന്റെ കഴുത്തില്‍ താലി കെട്ടുമെന്ന പ്രതീക്ഷയോടെ ഇപ്പോഴും ഞാന്‍ അവിവാഹിതയായി കഴിയുകയാണ്... അപ്പോഴാ ജയേട്ടന്‍ ഈ നാട്ടില്‍ തന്നെ ഉണ്ടെന്നു ഞാന്‍ അറിഞ്ഞതും ഫോണ്‍ നമ്പര്‍ കണ്ടുപിടിച്ചതും...
പക്ഷെ എനിക്ക് ഇപ്പോള്‍ ഒരു കുടുംബം ഒക്കെ ഉണ്ട്.
എനിക്ക് ജയേട്ടന്‍ മാത്രമെ ഉള്ളു
ഇന്ദൂ.. ഞാന്‍ പറയുന്നതു നീ മനസ്സിലാക്കു. നമുക്കു പഴയത് പോലെ ആവാന്‍ കഴിയില്ല..
അപ്പൊ എന്നെ സ്നേഹിച്ചതും മോഹിപ്പിച്ചതും ഒക്കെ എന്തിനായിരുന്നു ? ഇത്രയും കാലം ഞാന്‍ കാത്തിരുന്നത് എന്തിന് വേണ്ടിയായിരുന്നു ? ഞാന്‍ ജയെട്ടനെ കുറിച്ച് ഇങ്ങനെ ഒന്നുമല്ല വിചാരിച്ചത്.
*ബാക്ക്ഗ്രൌണ്ടില്‍ കരച്ചില്‍*
ഇന്ദൂ.. പ്ലീസ്.. ഞാന്‍ ഇപ്പോള്‍ ഒരു പെണ്‍കുട്ടിയെ മാത്രമെ സ്നേഹിക്കുന്നുള്ളൂ.. അത് പ്രിയ ആണ്.
അപ്പോള്‍ ഞാന്‍ ആരുമല്ലേ? എന്നെ മാത്രമേ സ്നേഹിക്കുന്നുള്ളൂ.. എന്നെ മാത്രമേ വിവാഹം കഴിക്കൂ എന്നൊക്കെ പറഞ്ഞിട്ട് ? ഇപ്പോള്‍ വേറെ ഒരു സുന്ദരിയെ കണ്ടപ്പോള്‍ എന്നെ വേണ്ട.. അല്ലെങ്കിലും ആണുങ്ങള്‍ എല്ലാം ഇങ്ങനെ തന്നെയാ.
നീ അങ്ങനെ പറയരുത്. എനിക്ക് നിന്നെ ഇഷ്ടമായിരുന്നു. ഒരുപാടു ഒരുപാടു ഇഷ്ടമായിരുന്നു. പക്ഷെ എന്തുകൊണ്ടോ വിധി നമ്മളെ അകറ്റി. നീ പോയതില്‍ പിന്നെ ഞാന്‍ എന്ത് മാത്രം വിഷമിച്ചു ? പിന്നീടെപ്പോഴോ എന്റെ ജീവിതത്തില്‍ താങ്ങും തണലുമായി പ്രിയ വന്നു. പതിയെ പതിയെ അവളോട്‌ എനിക്ക് ഇഷ്ടം തോന്നി.ഇപ്പോള്‍ ഞങ്ങളുടെ ജീവിതത്തിലെ സന്തോഷം തകര്‍ക്കാന്‍ വേണ്ടി നീ വരരുതു. ഇതു എന്റെ അപേക്ഷ ആണ്.
അപ്പോള്‍ എന്റെ സന്തോഷത്തിനും ആഗ്രഹത്തിനും ഒരു വിലയുമില്ലേ ? ഞാന്‍ ജയെട്ടനെ സ്നേഹിച്ചത് പോലെ അവള്ക്ക് സ്നേഹിക്കനാവുമോ? അവളെ ജയേട്ടന് സ്നേഹിക്കാന്‍ കഴിയുമോ ?
ഇന്ദൂ.. സ്നേഹം ഒരിക്കലും അളക്കാന്‍ ശ്രമിക്കരുത്. ഒരാളെ കൂടുതല്‍ സ്നേഹിക്കുക, കുറവ് സ്നേഹിക്കുക അങ്ങനെ ഒന്നുമില്ല. നിന്നെ ഞാന്‍ ഇപ്പോഴും സ്നേഹിക്കുന്നു. പക്ഷെ നിനക്കു വേണ്ടി പ്രിയയെ ഉപേക്ഷിക്കാന്‍ എനിക്കാവില്ല
ഇതു അവസാന വാക്കാണോ ?
*നിശബ്ദത*
അതെ
തീരുമാനത്തിന് ഒരു മാറ്റവുമില്ല ?
ഇല്ല
*നിശബ്ദത*
മിസ്റ്റര്‍ ജയന്‍
........
ഇതു ****** ചാനലിലെ ***** പരിപാടിയില്‍ നിന്നാണ് വിളിക്കുന്നെ. നിങ്ങള്‍ വിചാരിക്കുന്നതു പോലെ ഞാന്‍ ഇന്ദു ഒന്നുമല്ല. നിങ്ങളുടെ കമ്പനിയില്‍ ഉള്ള കൂട്ടുകാര്‍ വഴിയാണ് നിങ്ങളുടെ നമ്പര്‍ കിട്ടിയത്. ഈ ഇന്ദു ആരാണെന്നു പോലും എനിക്കറിയില്ല. എന്തായാലും ഈ ഏപ്രില്‍ ഫൂള്‍സ് ദിനത്തില്‍ നിങ്ങളെ വിളിച്ചു ചെറുതായി ഒന്നു പേടിപ്പിക്കുക മാത്രമായിരുന്നു ഞങ്ങളുടെ ഉദ്ദേശ്യം. നിങ്ങള്‍ ഒരു മാതൃക ഭര്‍ത്താവാണെന്ന് തെളിയിച്ചു കഴിഞ്ഞു . താങ്കളുടെ കുടുംബത്തിനു എല്ലാ വിധ ആശംസകളും നേര്‍ന്നു കൊണ്ടു ഈ കോമഡി സീന്‍ ഞങ്ങള്‍ വെച്ചു തരുന്നു.

നെറ്റിയില്‍ നിന്നു വിയര്‍പ്പു തുള്ളികള്‍ ഒപ്പുമ്പോള്‍ തന്റെ ഭാര്യ ഗീത ഈ പരിപാടി കാണാന്‍ ഇട വരരുതേ എന്നായിരുന്നു ജയന്റെ പ്രാര്ത്ഥന !!