ഞാന്‍ കഥയെഴുതുകയാണ്...

"ഡാ.. ഞാന്‍ ഒരു കഥ എഴുതി !"
"തള്ളേ കലിപ്പ്... നീ കഥ എഴുതിയെന്നാ ? നിന്റെ ഉള്ളില്‍ ബോധം കെട്ട് കിടന്ന കഥാകൃത്തിനെ നീ പടക്കങ്ങള് പൊട്ടിച്ചു ഉണര്‍ത്തിയാടെ ? എന്തെരേലും ആവട്ടെ... നീ വായിച്ചു കേപ്പിക്കെടെ.. "
"ദാ കേട്ടോളൂ..."

'അവന് അവളെ ഭയങ്കര ഇഷ്ടമായിരുന്നു. അവള്‍ക്കു അവനെയും. രണ്ടു പേരും പരസ്പരം ഒരുപാടു ഇഷ്ടപ്പെട്ടു. അവരുടെ ഇഷ്ടം കൂടുന്നതല്ലാതെ കുറയുന്നില്ലായിരുന്നു. എല്ലാവരും ഇവരുടെ ഇഷ്ടം മാതൃക ആക്കി !'

"നിര്‍ത്ത്‌ നിര്‍ത്ത്‌.... എന്തെരെടെ ഇതു ? ആരെടെ ലവനും ലവളും. പേരുകള്‍ ഒന്നുമില്ലേ? ലപ്പ്‌ ആണല്ലേ വിഷയം. സത്യം പറയെടെ. ഇതു എന്റെ കഥ വല്ലോം ആണോ?"
"ഇതു ആധുനിക കഥ ആണെടാ... നീ ഇടയ്ക്ക് വെച്ചു നിര്‍ത്താതെ മുഴുവന്‍ കേള്‍ക്ക് "
"കഥയില്‍ ഇഷ്ടങ്ങള് കൊറേ ഒണ്ടല്ലോ ... അത് കേള്‍ക്കാന്‍ കഷ്ടങ്ങള് തന്നെ അണ്ണാ... നീ വായിക്ക് "

'അവര്‍ രണ്ടു പേരും ഒരു ദൂര യാത്രക്ക് പുറപ്പെട്ടു. വഴിയില്‍ വെച്ചു അവള്‍ക്കു ദാഹിച്ചു. കൈയില്‍ വെള്ളം ഉണ്ടായിരുന്നത് തീര്‍ന്നു പോയി. അവന്‍ ചുറ്റും നോക്കിയിട്ട് പറഞ്ഞു : ദാ... ആ മലയുടെ മുകളില്‍ വെള്ളം കിട്ടും. നമുക്കു അങ്ങോട്ട് പോവാം.
അങ്ങനെ രണ്ടു പേരും മല കേറാന്‍ തുടങ്ങി. '

"അല്ല അളിയാ ഒരു സംശയം. മലയുടെ മണ്ടയില്‍ ബേക്കറി കണ്ടിട്ടാണോ അവന്‍ അങ്ങനെ പറഞ്ഞെ അതോ വല്ല അണ്ണാച്ചിയും അവിടെ ബോഞ്ചിവെള്ളങ്ങള് വെച്ചോണ്ട് ഇരിപ്പോണ്ടായിരുന്നാ?"
"ഓ നശിപ്പിച്ചു. അവിടെ മിണ്ടാതിരിക്കെടാ "

'മുകളില്‍ എത്തിയപ്പോള്‍ അവിടെ ഒരു കിണര്‍ ഉണ്ടായിരുന്നു. അതില്‍ നിന്നും വെള്ളം കോരി കുടിച്ചു രണ്ടു പേരും ദാഹം അകറ്റി. തിരികെ മല ഇറങ്ങുമ്പോള്‍ അവന്റെ കാലിടറി. അവന്‍ വീണു. ഉരുണ്ടുരുണ്ട്‌ വീണു. അവന്റെ നെറ്റി പൊട്ടി ചോര ഒഴുകി.

അവള്‍ അവന്റെ പിന്നാലെ നിലവിളിച്ചോണ്ട് ഓടി വന്നു. അവന്റെ നെറ്റിയിലെ ചോര കണ്ടു അവള്‍ക്കു വിഷമമായി. അവള്‍ തന്റെ വസ്ത്രത്തില്‍ നിന്നു ഒരു കഷ്ണം തുണി കീറി ആ മുറിവ് വെച്ചു കെട്ടി.

അവളുടെ കണ്ണുകളില്‍ നിന്നും കണ്ണുനീര്‍ ഒഴുകി. അവന്റെ മുഖത്ത് ഒരു പുഞ്ചിരി മാത്രം. അവളെ ആശ്വസിപ്പിക്കാന്‍ അവന്‍ പറഞ്ഞു : സാരമില്ല'

"എടാ.. നിര്‍ത്തെടാ നിന്റെ വായന. ഇതു നീ സ്വന്തം ആയിട്ട് എഴുതിയതാണോ ?"
"അതെ അളിയാ... എന്താ സംശയം ?"
"ഓഹോ... എങ്കില്‍ ലവന്റെ പേരു ജാക്ക് എന്നും ലവളുടെ പേരു ജില്‍ എന്നും ആയിരിക്കും അല്ലെ? "
"നീ ഇതു എന്തൊക്കെയാ പറയുന്നേ ?"
"എടാ മണ്ടന്‍ കൊണാപ്പി..... നീ എന്നെ വെറും മണ്ടന്‍ ആക്കല്ലെടെ.. ജാക്ക് ആന്‍ഡ്‌ ജില്‍ വെന്റ് അപ്പ് ദി ഹില്‍ ടു ഫെച്ച് എ പെയില്‍ ഓഫ് വാട്ടര്‍........ ഇതല്ലെടാ നിന്റെ കഥ ?"
"എന്റെ അളിയാ നിനക്കു അങ്ങനെ തോന്നിയോ? ആ കഥ വേറെ... ഈ കഥ വേറെ"
"ഉവ്വ് ഉവ്വ്... ആളെ വിട് അണ്ണാ... ഇനിയും കേള്‍ക്കാന്‍ ഒള്ള ശക്തി ഇല്ല !"

"ഛെ... അവന്‍ വരെ മനസ്സിലാക്കി.... വേറെ കഥ എഴുതുന്നതാ നല്ലത് !"


'ഒരിടത്ത് മേരി എന്നൊരു പെണ്‍കുട്ടി ഉണ്ടായിരുന്നു. അവള്‍ക്കു കൂട്ടായി ഒരു ആട്ടിന്‍കുട്ടിയും. മേരിക്ക് ആട്ടിന്‍കുട്ടിയെ വലിയ ഇഷ്ടമായിരുന്നു. ആട്ടിന്കുട്ടിക്കു തിരിച്ചും.................................................'